ພິທີລົງນາມ ບົດບັນທຶກຊ່ວຍຈໍາ ວ່າດ້ວຍການຮ່ວມມືວຽກງານສະກັດກັ້ນ ແລະ ຕ້ານການຄ້າມະນຸດ ລະຫວ່າງກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ, ກົມໃຫ່ຍຕໍາຫຼວດ,ກະຊວງປ້ອງກັນຄວາມສະຫງົບ ສປປລາວ ແລະ ກົມສະກັດກັ້ນ, ຕ້ານຢາເສບຕິດ ແລະ ອາສະຍາກໍາ, ກອງບັນຊາການທະຫານຊາຍແດນ, ກະຊວງປ້ອງກັນປະເທດ ສສ ຫວຽດນາມ.

ໃນຕອນເຊົ້າຂອງວັນທີ 15 ພະຈິກ 2024 ທີ່ນະຄອນຫຼວງຮ່າໂນຍ ສສ ຫວຽດນາມ ຄະນະຝ່າຍລາວນໍາໂດຍ ທ່ານ ພັອ ກິແກ້ວ ຈັນທະລັງສີ ຫົວໜ້າກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ, ກົມໃຫ່ຍຕໍາຫຼວດ, ກະຊວງປ້ອງກັນຄວາມສະຫງົບ ສປປລາວ ພ້ອມດ້ວຍຄະນະ, ແລະ ຝ່າຍຫວຽດນາມນໍາໂດຍ ທ່ານ ພົຈວ ໂດ ຫງ໋ອກ ແກງ ຫົວໜ້າກົມສະກັດກັ້ນ, ຕ້ານຢາເສບຕິດ ແລະ ອາສະຍາກໍາ, ກອງບັນຊາການທະຫານຊາຍແດນ, ກະຊວງປ້ອງກັນປະເທດພ້ອມດ້ວຍຄະນະ. ໄດ້ລົງນາມບົດບັນທຶກຊ່ວຍຈໍາວ່າດ້ວຍການຮ່ວມມືສະກັດກັ້ນ ແລະ ຕ້ານການຄ້າມະນຸດ ລະຫວ່າງກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ ສປປລາວ ແລະ ກົມສະກັດກັ້ນ, ຕ້ານຢາເສບຕິດ ແລະ ອາຊະຍາກຳ, ກອງບັນຊາການທະຫານຊາຍແດນ, ກະຊວງປ້ອງກັນປະເທດ ສສຫວຽດນາມ.

ການລົງນາມບົດບົນທຶກຊ່ວຍຈຳຄັ້ງນີ້ແມ່ນເພື່ອເປັນການຊຸກຍູ້, ເພີ້ມທະວີ ການປະສານໃນຂົງເຂດວຽກງານຕ້ານການຄ້າມະນຸດເປັນຕົ້ນແມ່ນ: ການແລກປ່ຽນຂ່າວສານ, ສະພາບອາສະຍາກໍາຄ້າມະນຸດເຂດຊາຍແດນ, ການໂຄສະນາເຜີຍແຜ່ວຽກງານຕ້ານການຄ້າມະນຸດໃຫ້ພໍ່ແມ່ປະຊາຊົນ ຢູ່ບໍລິເວນລາວ-ຫວຽດນາມໄດ້ຮັບຮູ້, ການປະສານສົມທົບການສຶບສວນ-ສອບສວນມ້າງລາຍຄະດີສະເພາະ, ເພື່ອຕໍ່ສູ້ກັບອາສະຍາກໍາຄ້າມະນຸດ, ການກອບກູ້ຊ່ວຍເຫຼືອກຸ່ມສ່ຽງ ແລະ ຜູ້ຖຶກເຄາະຮ້າຍຈາກການຄ້າມະນຸດຂອງທັງສອງຝ່າຍ, ພ້ອມນີ້ຍັງເປັນການຜັນຂະຫຍາຍການຮ່ວມມື ສອງຝ່າຍລາວ-ຫວຽດນາມ ເຂົ້າສູ່ລວງເລິກ ແລະ ກວມໃນຂົງເຂດວຽກງານຢ່າງຮອບດ້ານ, ເພື່ອແກ້ໄຂຕໍ່ບັນຫາອາສະຍາກໍາຄ້າມະນຸດຢ່າງຕັ້ງໜ້າ ແລະ ໃນປີ 2025 ສອງຝ່າຍແມ່ນຈະໄດ້ຮ່ວມກັນສ້າງແຜນການຈັດຕັ້ງປະຕິບັດ ບົດບັນທຶກຊ່ວຍຈໍາດັ່ງກ່າວເພື່ອເປັນການກໍານົດໜ້າວຽກລະອຽດໃນການເຮັດວຽກຮ່ວມກັນໃຫ້ມີປະສິດທິຜົນສູງສຸດ.