ຊຸດຝຶກອົບຮົມຄູຝຶກວຽກງານໂຄສະນາຕ້ານການຄ້າມະນຸດໃຫ້ແກ່ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານການຄ້າມະນຸດ ໄດ້ສຳເລັດລົງຢ່າງຈົບງາມ ໃນຕອນເຊົ້າຂອງວັນທີ 31 ຕຸລາ 2024 ຢູ່ທີ່ສະໂມສອນກອງພັນປ້ອງກັນເຄື່ອນທີ່ ກອງບັນຊາການ ປກສ ແຂວງຫົວພັນ, ໃຫ້ກຽດເຂົ້້າຮ່ວມມີ ທ່ານ ພັທ ນາງ ສິດທິເດດ ພຸດທະພັນ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ, ທ່ານ ພັທ ຄຳແພງ ແກ້ວມູນທອງ ຮອງຫົວໜ້າກອງບັນຊາການ ປກສ ແຂວງ ຫົວພັນ, ມີຄູຝຶກທີ່ມາຈາກກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ, ມີນັກສຳມະນາກອນທີ່ມາຈາກພະແນກຕຳຫຼວດສະກັດກັ້ນ ແລະ ຕ້ານການຄ້າມະນຸດ ກອງບັນຊາການ ປກສ ແຂວງ ຫົວພັນ ແລະ ແຂວງ ຊຽງຂວາງ, ກອງບັນຊາການ ປກສ ເມືອງ ຊໍາເໜືອ ແລະ ເມືອງ ວຽງໄຊ ມີຜູ້ເຂົ້າຮ່ວມທັງໝົດ ຈໍານວນ 25 ທ່ານ, ຍິງ 05 ທ່ານ.
ເພື່ອເປັນການສ້າງຄວາມເຂັ້ມແຂງໃຫ້ແກ່ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານການຄ້າມະນຸດ ໄດ້ຮັບຮູ້ ແລະ ເຂົ້າໃຈຫຼາຍຂື້ນ ກ່ຽວກັບ ຄວາມຮູ້ພື້ນຖານທັກສະຂອງການເປັນຄູຝຶກ, ໂດຍສະເພາະໃຫ້ກໍາໄດ້ນິຕິກໍາ, ກົດໝາຍ, ດໍາລັດ, ຫຼັກການວິຊາສະເພາະ, ເລ້ລ່ຽມກົນອຸບາຍຂອງການຄ້າມະນຸດ ເພື່ອນໍາໄປຜັນຂະຫຍາຍເຂົ້າໃນການໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ ແລະ ເຂົ້າໃຈ, ພ້ອມກັນສະກັດກັ້ນ ບັນຫາການຄ້າມະນຸດໃຫ້ສູງຂຶ້ນ, ເຮັດໃຫ້ອາຊະຍາກໍາການຄ້າມະນຸດໃຫ້ຫຼຸດໜ້ອຍຖອຍລົງ. ພາຍຫຼັງທີ່ໄດ້ສຳເລັດການຝຶກອົບຮົມແມ່ນ ໄດ້ລົງໂຄສະນາຕົວຈິງຢູ່ໂຮງຮຽນມັດທະຍົມຕອນຕົ້ນໂພນທອງ ບ້ານລ້ອງເອືອດ ເມືອງ ຊໍາເໜືອ ແລະ ໂຮງຮຽນມັດທະຍົມສົມບູນ ວຽງໄຊ ເມືອງ ວຽງໄຊ ແຂວງ ຫົວພັນ. ຫົວຂໍ້ທີ່ໄດ້ນໍາມາຝຶກອົບອົບຮົມຄັ້ງນີ້ ປະກອບມີ ສະພາບການຄ້າມະນຸດໃນໂລກ, ພາກພື້ນ ແລະ ສປປ ລາວ, ກົດໝາຍ ແລະ ສົນທິສັນຍາທີ່ກ່ຽວຂ້ອງກັບວຽກງານຕ້ານການຄ້າມະນຸດ, ຄວາມຮູ້ພື້ນຖານໃນການເປັນຄູຝຶກໂຄສະນາຕ້ານການຄ້າມະນຸດ, ຜົນກະທົບຈາກການຄ້າມະນຸດ, ການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ, ວິທີການໂຄສະນາໃຫ້ແກ່ກຸ່ມສ່ຽງ, ວິຊາການ, ພະນັກງານບັນຊາ ແລະ ກິດຈະກໍາອື່ນໆທີ່ກ່ຽວຂ້ອງ ເພື່ອເປັນການພັດທະນາຊັບພະຍາກອນມະນຸດໃຫ້ມີຄຸນນະພາບ, ມີຄວາມຮູ້ກ່ຽວກັບວຽກງານຕ້ານການຄ້າມະນຸດ ແລະ ກາຍເປັນຈຸດປະສານງານພາຍໃນຂົງເຂດຄວາມຮັບຜິດຊອບຂອງຕົນ, ສາມາດລົງໂຄສະນາຜົນຮ້າຍຂອງການຄ້າມະນຸດໃຫ້ແກ່ພໍ່ແມ່ປະຊາຊົນບັນດາເຜົ່າ ໂດຍສະເພາະ ລູກຫຼານ ແລະ ພໍ່ແມ່ປະຊາຊົນໃນພື້ນທີ່ຂອງຕົນ ບໍ່ໃຫ້ຕົກເປັນຜູ້ຖືກເຄາະຮ້າຍຈາກການຄ້າມະນຸດ. ຜ່ານການຝຶກອົບຮົມໄລຍະ 04 ວັນ ນັບແຕ່ວັນທີ 28-31 ຕຸລາ 2024 ເຫັນວ່ານັກສໍາມະນາກອນແຕ່ລະທ່ານ ໄດ້ເອົາໃຈໃສ່ຢ່າງຕັ້ງໜ້າ, ສາມາດຮູ້ໄດ້ ແລະ ເຂົ້າໃຈຢ່າງເລິກເຊິ່ງຕໍ່ວຽກງານຕ້ານການຄ້າມະນຸດ, ພາຍຫຼັງສໍາເລັດການຝຶກອົບຮົມ ກໍໄດ້ມີການມອບໃບຢັ້ງຢືນໃຫ້ແກ່ນັກສໍາມະນາກອນທີ່ເຂົ້າຮ່ວມ ໃຫ້ກຽດມອບໃບຢັ້ງຢືນ ໂດຍ ທ່ານ ພັທ ນາງ ສິດທິເດດ ພຸດທະພັນ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ. ພ້ອມນັ້ນ ທ່ານ ພັທ ຄຳແພງ ແກ້ວມູນທອງ ຮອງຫົວໜ້າກອງບັນຊາການ ປກສ ແຂວງ ຫົວພັນ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຍັງເນັ້ນໜັກໃຫ້ບັນດານັກສໍາມະນາກອນທີ່ເຂົ້າຮ່ວມ ຈົ່ງໄດ້ນໍາເອົາບົດຮຽນທີ່ໄດ້ຝຶກອົບຮົມໃນຄັ້ງນີ້ ໄປສືບຕໍ່ຜັນຂະຫຍາຍເຂົ້າໃນວຽກງານຂອງຕົນ ແລະ ເຜີຍແຜ່ວຽກງານດັ່ງກ່າວໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍຂອງການຄ້າມະນຸດ ເພື່ອເຮັດໃຫ້ບັນຫາການຄ້າມະນຸດ ຫຼຸດໜ້ອຍຖອຍລົງ.
ຂ່າວ-ພາບ: ສອນເພັດ ໄຊຍະສິດ
