ໃນລະຫວ່າງວັນທີ 09-13 ທັນວາ 2024 ນີ້, ທ່ານ ພົຈວ ກອງສະຫວັດ ບຸນລ້ຽງ ຮອງຫົວໜ້າກົມໃຫຍຕໍາຫຼວດ ກະຊວງປ້ອງກັນຄວາມສະຫງົບ, ຫົວໜ້າກອງເລຂາຄະນະກຳມະການຕ້ານການຄ້າມະນຸດລະດັບຊາດ ສປປ ລາວ ໄດ້ນໍາພາຄະນະຮັບຜິດຊອບທີ່ກ່ຽວຂ້ອງເຂົ້າຮ່ວມກອງປະຊຸມຄະນະປະຕິບັດງານ (RTF) ແລະ ກອງປະຊຸມເຈົ້າໜ້າທີ່ອາວຸໂສຄອມມິດ (SOM COMMIT) ຄັ້ງທີ 16 ທີ່ນະຄອນຊູໂຈ ສປ ຈີນ, ໂດຍການເປັນປະທານຂອງ ທ່ານ ສົງ ຢີ ລິວ ຮອງລັດຖະມົນຕີກະຊວງປ້ອງກັນຄວາມສະຫງົບ ສປ ຈີນ, ໂດຍມີ 06 ປະເທດລຸ່ມແມ່ນໍ້າຂອງ ເຂົ້າຮ່ວມ ຄື: ຣາຊະອານາຈັກກຳປູເຈຍ, ສະທາລະນະລັດສະຫະພາບມຽນມາ, ຣາຊະອານາຈັກໄທ, ສສ ຫວຽດນາມ, ສປປ ລາວ ແລະ ສປ ຈີນ.
ເພື່ອເປັນການປະຕິບັດຕາມແຜນການຂອງຂະບວນການຄອມມິດ COMMIT, ໃນເນື້ອໃນທີ່ໄດ້ປຶກສາກັນຄື:
1. ສະຫຼຸບຜົນການຈັດຕັ້ງປະຕິບັດ ແຜນປະຕິບັດງານຂອງ ສະປາ 4 (SPA4) ແລະ ຜ່ານແຜນປະຕິບັດງານຂອງ ສະປາ 5 (SPA5);
2. ປຶກສາຫາລືກົນໄກການສົ່ງຕໍ່ລະຫວ່າງປະເທດ (TRM) ແລະ ຮ່າງຕົວຊີ້ວັດ ຂອງການຄ້າມະນຸດ ໃນຮູບແບບບັງຄັບໃຫ້ກະທຳຜິດທາງອາຍາ ໂດຍການນຳໃຊ້ເຕັກໂນໂລຊີ ທີ່ເປັນເຄື່ອງມືເຂົ້າໃນການກະທຳຜິດ ພ້ອມທັງ ປຶກສາຫາລື ການແກ້ໄຂບັນຫາດັ່ງກ່າວ;
3. ຄວາມຍືນຍົງຂອງຂະບວນການຄອມມິດ ໃນພາກພື້ນລຸ່ມແມ່ນໍ້າຂອງ.
ຈຸດປະສົງ ກໍ່ເພື່ອເຮັດໃຫ້ການຮ່ວມມືໃນການສະກັດກັ້ນ ແລະ ຕ້ານການຄ້າມະນຸດໃນພາກພື້ນລຸ່ມແມ່ນໍ້າຂອງມີຄວາມໜັກແໜ້ນ, ລະຫວ່າງລັດຖະບານ 06 ປະເທດພວກເຮົາຕ້ອງຮ່ວມມືກັນປະສານສົມທົບຢ່າງໃກ້ຊິດ ເພື່ອແກ້ໄຂບັນຫາການຄ້າມະນຸດ, ປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍ ໃຫ້ທັນກັບສະພາບການໃນປະຈຸບັນ ແລະ ຕໍ່ໜ້າ.
