ຄະນະກຳມະການຕ້ານການຄ້າມະນຸດລະດັບຊາດ ຂຽນເປັນຕົວຫຍໍ້ ວ່າ ຄຕມຊ, ແມ່ນການຈັດຕັ້ງໜຶ່ງ ຂອງລັດຖະບານ ທີ່ບໍ່ປະຈຳການ, ມີພາລະບົດບາດເປັນເສນາທິການໃຫ້ແກ່ລັດຖະບານ ໃນການຊີ້ນຳ, ຕິດຕາມ, ກວດກາ, ຊຸກຍູ້ບັນດາກະຊວງ, ອົງການ ແລະ ພາກສ່ວນທີ່ກ່ຽວຂ້ອງ ຄົ້ນຄ້ວານະໂຍບາຍ, ແຜນຍຸດທະສາດ ແລະ ກົດໝາຍ ກ່ຽວກັບການຕ້ານການຄ້າມະນຸດ; ໂຄສະນາ, ຂົນຂວາຍ, ຍາດແຍ່ງທຶນຮອນ ແລະ ເຕັກນິກວິຊາການ; ເປັນໃຈກາງໃນການປະສານສົມທົບ ກັບພາກສ່ວນທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ໃນການປະຕິບັດວຽກງານຕ້ານການຄ້າມະນຸດ ຂອງ ສປປລາວ.
ຄະນະກຳມະການຕ້ານການຄ້າມະນຸດລະດັບຊາດ ມີກອງເລຂາເປັນກົງຈັກຊ່ວຍວຽກ ໂດຍຖືເອົາກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ຂອງກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ເປັນຫ້ອງການ.
ຄະນະກຳມະການຕ້ານການຄ້າມະນຸດລະດັບຊາດ ມີໂຄງປະກອບບຸກຄະລາກອນດັ່ງນີ້:
- ທ່ານ ຮອງນາຍົກລັດຖະມົນຕີ ເປັນປະທານ
- ທ່ານ ລັດຖະມົນຕີກະຊວງປ້ອງກັນຄວາມສະຫງົບ ເປັນຮອງປະທານ ແລະ ຜູ້ປະຈຳການ
- ທ່ານ ຮອງລັດຖະມົນຕີກະຊວງປ້ອງກັນຄວາມສະຫງົບ ເປັນຮອງປະທານ
- ທ່ານ ຮອງປະທານສູນກາງສະຫະພັນແມ່ຍິງລາວ ເປັນຮອງປະທານ
- ທ່ານ ຮອງລັດຖະມົນຕີກະຊວງການຕ່າງປະເທດ ເປັນຮອງປະທານ
- ທ່ານ ຮອງຫົວໜ້າຫ້ອງການວ່າການສຳນັກງານນາຍົກລັດຖະມົນຕີ ເປັນກຳມະການ
- ທ່ານ ຮອງລັດຖະມົນຕີກະຊວງຍຸຕິທຳ ເປັນກຳມະການ
- ທ່ານ ຮອງລັດຖະມົນຕີກະຊວງສາທາລະນະສຸກ ເປັນກຳມະການ
- ທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ ເປັນກຳມະການ
- ທ່ານ ຮອງລັດຖະມົນຕີກະຊວງຖະແຫຼວງຂ່າວ, ວັດທະນະທຳ ແລະ ທ່ອງທ່ຽວ ເປັນກຳມະການ
- ທ່ານ ຮອງເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ ເປັນກຳມະການ
- ທ່ານ ຮອງປະທານສຸນກາງສະຫະພັນກຳມະບານລາວ
- ທ່ານ ຮອງຫົວໜ້າກົມໃຫຍ່ຕຳຫຼວດ, ຜູ້ຊີ້ນຳວຽກງານຕ້ານການຄ້າມະນຸດ ເປັນກຳມະການ ແລະ ຫົວໜ້າກອງເລຂາ
