ໃນວັນທີ 01-02 ພະຈິກ 2024 ທີ່ ໂຮງແຮມ ເອັສ ວັງວຽງ, ເມືອງ ວັງວຽງ, ແຂວງວຽງຈັນ ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ຮ່ວມກັບ ມູນນິທິເອເຊຍ ປະຈໍາ ສປປ ລາວ ແລະ ກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ຈັດຝຶກອົບຮົມຫົວຂໍ້ ການເພີ່ມທະວີຄວາມເຂົ້າໃຈຂອງສື່ມວນຊົນກ່ຽວກັບການຄ້າມະນຸດ, ການຊ່ວຍປົກປ້ອງ, ຊ່ວຍເຫຼືອ ແລະ ສົ່ງຕໍ່ຜູ້ຖືກເຄາະຮ້າຍ ແລະ ການລາຍງານຂ່າວກ່ຽວກັບການຄ້າມະນຸດ ໂດຍການເປັນປະທານຮ່ວມຂອງ ທ່ານ ນາງ ບຸນເຫຼືອ ຈັນທະພົມມາ ຫົວໜ້າສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ, ສູນກາງສະຫະພັນແມ່ຍິງ, ຮອງຫົວໜ້າກອງເລຂາຄະນະກໍາມະການຕ້ານການຄ້າມະນຸດລະດັບຊາດ, ທ່ານ ພັທ ຖາວອນ ແກ້ວພິລາ ຮອງຫົວໜ້າກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ແລະ ທ່ານ ນາງ ສິຣິວອນໄຊ ພຣົມມາລາ ຜູ້ບໍລິຫານໂຄງການສ້າງຄວາມເຂັ້ມແຂງໃຫ້ເຄືອຄ່າຍຕ້ານການຄ້າມະນຸດລະດັບຊາດ ແລະ ການເຂົ້າເຖິງຂະບວນຍຸຕິທໍາ. ມີບັນດາທ່ານຜູ້ຕາງໜ້າຈາກ ສື່ມວນຊົນ ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ກະຊວງຖະແຫຼ່ງຂ່າວ ແລະ ວັດທະນະທໍາ, ກົມຂ່າວສານສູນກາງສະຫະພັນແມ່ຍິງລາວ ເຂົ້າຮ່ວມ.
ຈຸດປະສົງໃນການຈັດຝຶກອົບຮົມຄັ້ງນີ້ແມ່ນເພື່ອສ້າງຄວາມເຂັ້ມແຂງໃຫ້ແກ່ພະນັກງານສື່ມວນຊົນ ກ່ຽວກັບການໂຄສະນາເຜີຍແຜ່ວຽກງານຕ້ານການຄ້າມະນຸດ ແລະ ການລາຍງານຂ່າວກ່ຽວກັບການຄ້າມະນຸດໃຫ້ມີຄວາມຖືກຕ້ອງ, ຊັດເຈນ ແລະ ທັນການ ກໍ່ຄືການປົກປ້ອງສິດຂອງຜູ້ຖືກເຄາະຮ້າຍ ໃຫ້ຄວາມຮັບຮູ້, ເຂົ້າໃຈເລິກເຊິ່ງ ແລະ ພ້ອມກັນຈັດຕັ້ງປະຕິບັດໃຫ້ກາຍເປັນຮູບປະທໍາຕົວຈິງ ແລະ ເປັນເອກກະພາບ. ພາຍໃນຝຶກອົບຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບ ຄວາມເຂົ້າໃຈກ່ຽວກັບການຄ້າມະນຸດ, ການປົກປ້ອງ, ຊ່ວຍເຫຼືອ ແລະ ການສົ່ງຕໍ່ຜູ້ເຄາະຮ້າຍຈາກາກນຄ້າມະນຸດ, ຈັນຍາບັນກ່ຽວກັບການລາຍງານຂ່າວຂອງການຄ້າມະນຸດ, ພາລະບົດບາດຂອງສື່ໃນການຕ້ານການຄ້າມະນຸດ, ຍຸດທະສາດສື່ມວນຊົນສໍາລັບການລາຍງານກ່ຽວກັບການຄ້າມະນຸດ, ການນໍາໃຊ້ເຄື່ອງມືຂອງສື່ເພື່ອສົ່ງເສີມການລາຍງານ ແລະ ການພັດທະນາແຜນໂຄສະນາສ່ວນໂຕ.
ຂ່າວ: ທິດາ ສິດທິໄຊ
ພາບ: ລັດສະໝີ ເພຍເທບ
