ໃນວັນທີ28-29 ຕຸລາ 2024 ທີ່ໂຮງແຮມຈໍາປາ ແຂວງຫຼວງນໍ້າທາ, ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ຮ່ວມກັບມູນນິທິເອເຊຍ ປະຈໍາ ສປປ ລາວ ໄດ້ຈັດຝຶກອົບຮົມວຽກງານໄກ່ເກ່ຍຂໍ້ຂັດແຍ່ງຂັ້ນບ້ານ ແລະ ວຽກການຊ່ວຍເຫຼືອດ້ານກົດໝາຍ ທີ່ຕິດພັນກັບວຽກງານການປົກປ້ອງ,ຊ່ວຍເຫຼືອ ແລະ ການສົ່ງຕໍ່ຜູ້ຖືກເຄາະຮ້າຍຈາກການຄ້າມະນຸດ ໃຫ້ແກ່ໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ ເມືອງຫຼວງນໍ້າທາ, ແຂວງຫຼວງນໍ້າທາ ໂດຍການເປັນປະທານຮ່ວມຂອງ ທ່ານ ນາງ ບົວວັນ ພົມມະລິດ ຄະນະບໍລິຫານງານສູນກາງສະຫະພັນແມ່ຍິງລາວ,ກຳມະການພັກແຂວງ, ປະທານສະຫະພັນແມ່ຍິງແຂວງຫຼວງນໍ້າທາ, ທ່ານ ຄໍາພຸດ ໂພທິລາດ ກຳມະການປະຈໍາພັກເມືອງ, ປະທານແນວລາວສ້າງຊາດ ຜູ້ຊີ້ນໍາອົງການຈັດຕັ້ງມະຫາຊົນເມືອງຫຼວງນໍ້າທາ, ທ່ານ ນາງ ສີວິໄລ ພົມມີສຸກ ຮອງຫົວຫນ້າສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ, ສູນກາງສະຫະພັນແມ່ຍິງລາວ ແລະ ທ່ານ ນາງ ສີຣິວອນໄຊ ພົມມາຣາ ຜູ້ບໍລິຫານໂຄງການສ້າງຄວາມເຂັ້ມແຂງໃຫ້ເຄືອຄ່າຍຕ້ານການຄ້າມະນຸດລະດັບຊາດ ແລະ ການເຂົ້າເຖິງຂະບວນຍຸຕິທໍາ. ມີບັນດາຄູຝຶກຈາກ ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ສູນກາງສະຫະພັນແມ່ຍິງລາວ, ກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ກະຊວງປ້ອງກັນຄວາມສະຫງົບ, ກະຊວງຍຸຕິທຳ ແລະ ຜູ້ຕ່າງຫນ້າຈາກ ຂະແໜງການຍຸຕິທໍາ, ສະຫະພັນແມ່ຍິງ ແຂວງ ແລະ ເມືອງ, ຄະນະໜ່ວຍໄກ່ເກ່ຍຂັ້ນບ້ານ ແລະ ແມ່ຍິງບ້ານ 06 ບ້ານຂອງ ເມືອງ ຫຼວງນໍ້າທາ,ແຂວງ ຫຼວງນໍ້າທາ ເຂົ້າຮ່ວມ, ຈໍານວນຜູ້ເຂົ້າຮ່ວມທັງໝົດ 45 ຄົນ, ຍິງ 22 ຄົນ.
ຈຸດປະສົງໃນການຈັດຝຶກອົບຄັ້ງນີ້ແມ່ນເພື່ອສ້າງຄວາມເຂົ້າໃຈກ່ຽວກັບຂັ້ນຕອນການປະສານງານເພື່ອຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ ແລະ ຮັບປະກັນໃຫ້ຜູ້ຖືກເຄາະຮ້າຍຈາກການຄ້າມະນຸດໄດ້ເຂົ້າເຖິງຂະບວນການປົກປ້ອງ ແລະ ຊ່ວຍເຫຼືອໄດ້ຢ່າງທັນການ ແລະ ມີປະສິດທິຜົນ ແນ່ໃສ່ເຮັດໃຫ້ການປົກປ້ອງ,ຊ່ວຍເຫຼືອ ແລະ ການສົ່ງຕໍ່ຜູ້ຖືກເຄາະຮ້າຍເປັນບະບົບ ແລະ ມີຄວາມເປັນເອກະພາບກັນ. ໃນນັ້ນບັນດາຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບ ສະພາບການຄ້າມະນຸດຢູ່ໃນພາກພື້ນ ແລະ ສປປ ລາວ, ການກໍານົດຕົວຜູ້ຖືກເຄາະຮ້າຍຈາກການຄ້າມະນຸດ, ການປົກປ້ອງ, ການຊ່ວຍເຫຼືອ ແລະ ການສົ່ງຕໍ່ຜູ້ຖືກເຄາະຮ້າຍ, ການປ້ອງກັນການຄ້າມະນຸດ ແລະ ການຊ່ວຍເຫຼືອທາງດ້ານກົດໝາຍແກ່ຜູ້ຖືກເຄາະຮ້າຍຈາກການຄ້າມະນຸດ.
ຂ່າວ+ພາບ: ທິດາ ສິດທິໄຊ
