ໃນວັນທີ 28 ຕຸລາ 2024, ກອງເລຂາຄະນະກຳມະການຕ້ານການຄ້າມະນຸດລະດັບຊາດ ໄດ້ເປີດຊຸດຝຶກອົບຮົມຄູຝຶກວຽກງານໂຄສະນາຕ້ານການຄ້າມະນຸດໃຫ້ແກ່ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານການຄ້າມະນຸດ ຢູ່ທີ່ສະໂມສອນ ກອງບັນຊາການ ປກສ ແຂວງ ຫົວພັນ, ໂດຍການເປັນປະທານຮ່ວມຂອງ ທ່ານ ພັທ ນາງ ສິດທິເດດ ພຸດທະພັນ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ, ມີ ທ່ານ ພັທ ຄຳແພງ ແກ້ວມູນທອງ ຮອງຫົວໜ້າກອງບັນຊາການ ປກສ ແຂວງ ຫົວພັນ, ມີຄູຝຶກທີ່ມາຈາກກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ, ມີນັກສຳມະນາກອນທີ່ ມາຈາກພະແນກຕຳຫຼວດສະກັດກັ້ນ ແລະ ຕ້ານການຄ້າມະນຸດ ກອງບັນຊາການ ປກສ ແຂວງ ຫົວພັນ ແລະ ແຂວງ ຊຽງຂວາງ, ກອງບັນຊາການ ປກສ ເມືອງ ຊໍາເໜືອ ແລະ ເມືອງ ວຽງໄຊ ເຂົ້າຮ່ວມຈໍານວນ 25 ທ່ານ, ຍິງ 05 ທ່ານ.
ທ່ານ ພັທ ນາງ ສິດທິເດດ ພຸດທະພັນ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ໃຫ້ຮູ້ວ່າ: ບັນຫາການຄ້າມະນຸດແມ່ນ ເປັນອາຊະຍາກຳທີ່ຮ້າຍແຮງ ເກີດຂື້ນຢູ່ພາຍໃນ ແລະ ຂ້າມຊາດ, ເປັນອາຊະຍາກຳທີ່ລະເມີດສິດທິພື້ນຖານຂອງຄວາມເປັນມະນຸດຢ່າງຮ້າຍແຮງ ຊຶ່ງໄດ້ສົ່ງຜົນກະທົບໂດຍກົງ ທາງດ້ານຮ່າງກາຍ ແລະ ຈິດໃຈ ຂອງຜູ້ຖືກເຄາະຮ້າຍ ແລະ ຄອບຄົວ, ເປັນປະກົດການຫຍໍ້ທໍ້ທີ່ເກີດຂື້ນໃນສັງຄົມ ແລະ ສົ່ງຜົນກະທົບຕໍ່ສັງຄົມກໍຄືການພັດທະນາ ແລະ ສ້າງສາປະເທດຊາດ. ວິທີການຄ້າມະນຸດທີ່ພົ້ນເດັ່ນ ແມ່ນຮູບການຕົວະຍົວະຫຼອກລວງໄປຂາຍເຄື່ອງ, ໄປເສີບອາຫານ, ການຂົນຄວາຍເອົາແຮງງານລາວໄປອອກແຮງງານແບບຜິດກົດໝາຍ ແລະ ຂົນຂວາຍເອົາຍິງສາວລາວໄປແຕ່ງດອງກັບຄົນຕ່າງປະເທດ ດ້ວຍຮູບການໝັ້ນໝາຍແອບແຝງ, ໄປທ່ອງທ່ຽວ, ໄປຕອບແຊັດ, ຖືພາແທນ, ເຜີຍແຜ່ສິ່ງລາມົກຜ່ານທາງອອນລາຍ ແລະ ອື່ນໆ.
ຈຸດປະສົງຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອເປັນການສ້າງຄວາມເຂັ້ມແຂງໃຫ້ແກ່ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານການຄ້າມະນຸດ ໄດ້ຮັບຮູ້ ແລະ ເຂົ້າໃຈຫຼາຍຂື້ນ ກ່ຽວກັບ ຄວາມຮູ້ພື້ນຖານທັກສະຂອງການເປັນຄູຝຶກ, ໂດຍສະເພາະໃຫ້ກໍາໄດ້ນິຕິກໍາ, ກົດໝາຍ, ດໍາລັດ, ຫຼັກການວິຊາສະເພາະ, ເລ້ລ່ຽມກົນອຸບາຍຂອງການຄ້າມະນຸດ ເພື່ອນໍາໄປຜັນຂະຫຍາຍເຂົ້າໃນການໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ ແລະ ເຂົ້າໃຈ, ພ້ອມກັນສະກັດກັ້ນ ບັນຫາການຄ້າມະນຸດໃຫ້ສູງຂຶ້ນ, ເຮັດໃຫ້ອາຊະຍາກໍາການຄ້າມະນຸດໃຫ້ຫຼຸດໜ້ອຍຖອຍລົງ. ພາຍຫຼັງທີ່ສຳເລັດການຝຶກອົບຮົມແມ່ນ ຈະໄດ້ລົງໂຄສະນາຕົວຈິງຢູ່ໂຮງຮຽນ ມ.ສ ລ້ອງເອືອດ ແລະ ໂຮງຮຽນ ມ.ສ ເມືອງ ວຽງໄຊ ແຂວງ ຫົວພັນ. ຫົວຂໍ້ທີ່ໄດ້ນໍາມາຝຶກອົບອົບຮົມຄັ້ງນີ້ ປະກອບມີ ສະພາບການຄ້າມະນຸດໃນໂລກ, ພາກພື້ນ ແລະ ສປປ ລາວ, ກົດໝາຍ ແລະ ສົນທິສັນຍາ, ຄວາມຮູ້ພື້ນຖານໃນການເປັນຄູຝຶກໂຄສະນາຕ້ານການຄ້າມະນຸດ, ຜົນກະທົບຈາກການຄ້າມະນຸດ, ການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ, ວິທີການໂຄສະນາໃຫ້ແກ່ກຸ່ມສ່ຽງ, ວິຊາການ, ພະນັກງານບັນຊາ ແລະ ກິດຈະກໍາອື່ນໆທີ່ກ່ຽວຂ້ອງ ເພື່ອເປັນການພັດທະນາຊັບພະຍາກອນມະນຸດໃຫ້ມີຄຸນນະພາບ, ມີຄວາມຮູ້ກ່ຽວກັບວຽກງານຕ້ານການຄ້າມະນຸດ ແລະ ກາຍເປັນຈຸດປະສານງານພາຍໃນຂົງເຂດຄວາມຮັບຜິດຊອບຂອງຕົນ, ພ້ອມທັງສາມາດລົງໂຄສະນາຜົນຮ້າຍຂອງການຄ້າມະນຸດໃຫ້ແກ່ພໍ່ແມ່ປະຊາຊົນບັນດາເຜົ່າ ໂດຍສະເພາະ ລູກຫຼານ ແລະ ພໍ່ແມ່ປະຊາຊົນໃນພື້ນທີ່ຂອງຕົນ ບໍ່ໃຫ້ຕົກເປັນຜູ້ຖືກເຄາະຮ້າຍຈາກການຄ້າມະນຸດ.
ຂ່າວ-ພາບ: ສອນເພັດ ໄຊຍະສິດ
